"بسم الله الرحمن الرحيم "
مناسببة حلول موسم الاختبارا ت أعاده الله عليكم ( بس ) بالخير والبركات
حابة نتكلم شوي عن الطقوس الغريبة اللي تصير في الاختبارات عندنا يا البنات
نبدأ بالطقوس الاختباراتية الغريبة
1- الثلاث وجبات تقعد عليها أول وحده ( جوعانه المسكينة ) وأحيان تزيد وجبات اضافية إذا كانت المادة صعبة ودسمة ...
2- تسوي نفسها تعبانه وياربييي ماني قادرة أذاكر حاسه بكتمة يمه مدري شفيني وتقعد
تقول أمها اسم الله عليك تعالي اقرا عليك وتقول الظاهر أحد صكني عين (( يا حبيبي عالحركات
عشان اذا رسبت بالمادة تقول عين )) ترا هذي واجده ماره علي مو أنا طبعا بس بنات يسوونها كثير
ذابحهم الدلع
3- بعضهم ينزل عليهم وسواس النظافة وتستحم ليل ونهار وتجلس تستشور شعرها والكتاب مرمي على جنب بس قريب حتى تحس بالآمان ( تقنع نفسها أنها باذله جهدها )
4-ووحده ثانيه تترك الكتاب وتقوم تقيس فستان السهرةعشان بعد الاختبارات خبركم زواج فلانه وعلانه ...( هذي كذا كذا ماهي مذاكرة فأحسن تسوي شي مفيد )
5- والبعض الآخر ( اخس يالعربي الفصحى ) ليلة الإختبارات عند الخياطه تسوي بروفة ( والله من قل الدبرة )
6- وبعضهم تنزل عليهم صلة رحم ( ويا كثرهم ) وتجيك تكلم صاحباتها القدام وقريباتها تضيع وقت أقصد تتهرب ...
7- وفيه ناس تنزل عليهم شطارة من المريخ وتقوم تسوي لأهلها العشاء لا وبعد تغسل الصحون عن الشغاله ( يا حظ الشغالة )
8- وهذي مبتلية بحب الجوال ( قالبتها شات مو مسجات ) وما تحس بنفسها إلا قبل الفجر بشوي
تذاكر أي كلام
9- وش رايكم باللي يصيبهم فيروس اسمه النوم وهو : فيروس وهمي
لا يظهر الا في الاختبارات وينعدم في الاجازات .. وهو يؤدي الى حاله غير طبيعية من
النعاس يشعر معه الطالب أنه لم ينم منذ شهر وإذا نظرت للطالب المصاب به ( ترحمه وتنزل
دمعتك عليه )
تقول حرام ما نام من سنه وتدعو له بالخلاص من هذا الهم ... مع العلم انه يكون توه
صاحي من النوم غريبة صح ؟؟؟؟؟؟؟!!!!!!...
هذا أنا اعرفه زين ودايما يجيني هالفايروس أبعده الله عني وعنكم جميعااااا ( رددو وراي آآآآآمين )
والله الإختبارات شي صعب ولكنها وقت رائع وتصير فيه مواقف مضحكه كثيرةولكنها كابوس شئنا أم أبينا